لأناقة المحجبات

قبل ماتشترى فكرى

علشان البنت تشتري طرحة كويسة يبقى لازم قبل ما تنزل تشتري تفكر وتعرف هي

ناقصها إيه في الدولاب؟!..علشان كده بقول لكل بنت افتحي دولابك وشوفي عندك كام

بادي وكام تي شيرت وكام بنطلون وإيه هي الألوان اللي أنتى محتاجة لها، علشان لما تشتري

تكون الحاجة اللي هتشتريها مناسبة للون اللبس اللي عندك....كمان لازم يكون في دولابك ألوان

أساسية زي الأبيض والبني والرمادي والأسود والبيج لأن الألوان دي بتليق على كل اللبس.

كمان لو مش عارفة تجيبي نفس درجة اللون أو الخامة اللي أنتى عايزاها يبقى لازم تلفي على

أكتر من محل لغاية ما تلاقي اللي أنتى عايزاه.

اختاري اللون المناسب لبشرتك

هنتكلم دلوقتي عن إزاي البنت تختار لون الطرح المناسبة للون بشرتها ودي المرحلة التالية بعد

ما البنت تحدد اللي محتاجة له.. وفيه حاجة لازم ألفت نظرك إليها، وهي إنك ما تحطيش ماكياج صارخ

وأنت نازلة تشتري الطرح علشان تقدري تختاري الطرح المناسبة ليكي، وكفاية إنك تكوني حاطة ماكياج

خفيف، كمان حاولي تلبسي ألوان سادة وأنت رايحة تشتري الطرح أو الإيشاربات علشان تقدري تختاري

اللي أنت عايزاه، وياريت بعد ما تختاري الخامة واللون اللي أنت عايزاه تحطي الإيشارب على وشك

وتقفي قدام مرايات المحل وتشوفي إذا كان اللون مناسب للون بشرتك فعلا ولا لأ؟!

وبصفة خاصة بنلاقي...

إن أصحاب البشرة الخمرية بيليق عليهم الألوان الفاتحة والغامقة والوسط...

لكن البنات أصحاب البشرة البيضاء بيليق عليهم الألوان الغامقة زي الأسود والكحلي والأخضر

والأحمر الغامق والذهبي الغامق... وطبعا مش بيليق عليهم الألوان الفاتحة زي الأبيض أو الأصفر

الفاتح أو الرمادي الفاتح نهائي، لأن الألوان دي بتخلي الوش كله يبان كأنه شاحب، علشان كده بنلاقي إن

البنات اللي بتلبس إيشاربات ألوانها فاتحة وبشرتها بيضاء بيحتاجوا يحطوا ماكياج كتير علشان بشرتهم

ماتبانش مجهدة وشاحبة...

أما البنات أصحاب البشرة السمراء أو الداكنة فالحاجة المناسبة لهم هي الإيشاربات الفاتحة طبعا زي

"الموف الفاتح"و"التركواز" و"الفوشيا" و"الأخضر الفاتح" ويفضل طبعا إنهم يحطوا ماكياج خفيف

وما يحاولوش يفتحوا لون بشرتهم ويقتنعوا إن البشرة السمراء دي ميزة لأنها مابتعجزش بسرعة

وما بيبانش فيها أي تجاعيد بسرعة.

لوكنت سنة أولى حجاب

دلوقتي عايزة أقول شوية نصائح للبنت اللي أول مرة تلبس حجاب.. وعلى فكرة النصائح دي برضه

مفيدة لأي بنت محجبة...

-1-ما تحاوليش تجيبي الطرح الصعبة زي الستان أو المكشكشة أو الحرير أو الطرح اللي فيها تطريز

كتير لأن كل ما كانت الطرحة بسيطة وما فيهاش تطريز كتير هتكون أسهل في اللبس، وعلى فكرة القطن

مناسب جدا هو والشيفون التقيل أسهل في الربط من أي طرحة تانية.

-2-لو كنت بتشتكي إن الطرحة بتاخد منك وقت طويل في اللبس يبقى ممكن تلبسي بندانة قطن تحت

الطرحة وده لأن البندانة هتساعدك إنك تربطي الطرحة بسرعة.

كمان خدي بالك إنك لو هتلبسي طرحة شفافة وهتبين شعرك من تحت يبقى المفروض تلبسي تحتها

بونيه خفيف أو طرحة تانية قطن أو بندانة علشان تداري شعرك.

-3-أنصح أي بنت لسه هتتحجب أو تلبس إيشارب جديد إنها تاخد بالها من لبسها لأن اللبس

عليه عامل مهم جدا في اختيار الإيشارب، فمينفعش تلبسي ضيق من تحت وتكوني محجبة لأن

بكده هتكوني منتقدة أوي، وياريت قبل ماتتحجبي تظبطي لبسك وتجيبي هدوم واسعة مناسبة للحجاب.

-4-اوعي تلبسي طرح فيها تطريز وحاجات بتلمع كتير وأنت رايحة الجامعة أو الشغل الصبح،

لأن ده شيء مرفوض تماما ومش مناسب للجامعة أو للشغل وبيقلل من شياكتك

الموضوع منقول للفائدة.....

يارب يعجبكو.....

متشك اوى على الموضوع الهايل ده

ميرسى يانور
نورت التوبيك